Bakkafrost skipaði fyri ESG Verkstovu fyri Varandi Vinnu
22.08.2025
Bakkafrost skipaði fyrradagin fyri verkstovu fyri fyritøkum í netverkinum Varandi Vinna. Verkstovan snúði seg í høvuðsheitum um, hvussu fyritøkur kunnu máta útlátið av vakstrarhúsgassum í samsvari við altjóða standardir, so sum Greenhouse Gas (GHG) Protocol. Harafturat gav verkstovan innlit í sosialu lyklatølini, sum eru kravd eftir European Sustainability Reporting Standards (ESRS), so sum samanseting av arbeiðsmegi, heilsu og trygd, og javnstøðu.
Tiltakið varð hildið á høvuðssætinum hjá Bakkafrost á Glyvrum. Nógvar fyritøkur møttu, sum vísir vaksandi áhugan í menna burðardygdarfrágreiðingar og seta ferð á grønu umleggingina. Bakkafrost deildi ta vitan, sum felagið hevur bygt upp gjøgnum mong ár í arbeiðinum at gera burðardygdarfrágreiðingar og at stýra og máta CO2 útlátið hjá fyritøkuni.
Tordis Poulsen, Stjóri fyri Burðardygd og Bjarki Johannessen, ESG roknskaparleiðari, løgdu fram um háttalagið hjá Bakkafrost at útrokna vakstrarhúsgassútlát í Vavi 1, 2 og 3. Her varð serligur dentur lagdur á útláts- og umrokningarfaktorar, sporføri, og at háttalagið er í samsvar við Science Based Targets. Luttakararnir fingu praktiska vegleiðing í, hvussu uppgerðin verður sett upp í eitt Excel skjal, og hvussu hesar dátur verða nýttar í CSRD/ESRS frágreiðingum og málum um minking av CO2 útláti.
Aftaná framløguna var opið orðaskifti. Luttakararnir vóru sera áhugaðir í framløgunum, og øðrum evnum um burðardygga menning. Orðaskiftið og áhugin vísir á virði í at deila innanhýsis vitan og praktiskar mannagongdir í netverkinum. Tiltakið lýsir, hvussu Varandi Vinna stuðlar grønu umleggingini í Føroyum, sum Bakkafrost gevur sítt íkast til gjøgnum ein virknan leiklut og at deila vitan í netverkinum.
Um Varandi Vinnu
Varandi Vinna er eitt netverk fyri fyritøkur, sum ynskja at samstarva um burðardygd. Endamálið er at savna saman fyritøkur, ið eru áhugaðar í burðardyggari menning og grønu umleggingini. Tað er ein pallur, ið deilir vitan og mannagongdir tvørturum fyritøkur og vinnugreinar.